A 10000 km do BAFICI 2015: Bill Morrison

Re:Awakenings
Bill Morrison (EEUU, 2013)
18 min | B/N & Cor

En 1969 un neurólogo de trinta e tantos anos, Oliver Sacks, encontrouse nun hospital do Bronx cun grupo de enfermos que levaban décadas en estado catatónico. Identificounos como sobreviventes dunha devastadora epidemia de encefalite catro décadas atrás e probou con eles un novo medicamento que produciu resultados extraordinarios: os pacientes espertaron do seu tráxico letargo e el estaba alí para documentalo coa cámara. Unha historia memorábel, bigger than life, que orixinou un libro, Awakenings; a ficción homónima de Penny Marshall e agora esta curta de Bill Morrison que emprega as imaxes orixinais en super-8 e a música de Philip Glass para tributar, entre o asombro e a bágoa, unha xusta homenaxe ao doutor Sacks.

The Great Flood
Bill Morrison (EEUU, 2013)
78 min | B/N

Incansábel rastrexador de arquivos, Bill Morrison practicou fórmulas diversas de reelaboración de imaxes primitivas. Xunto ao traballo sistemático sobre o carácter material do cinema, que sublimou na colosal Decasia ou en curtas como Light is Calling, nos últimos anos ensaiou contidos máis narrativos, ben sexa a intelixente relectura do Frankenstein de Mary Shelley que fixo en Spark of Being ou o rexistro canonicamente documental de The Great Flood, fascinante achegamento con música do jazzman Bill Frisell e ecos do Ol' Man River á inundación do Mississippi de 1927 que obrigou a desprazar a máis de 600 mil persoas. Mais aínda que as excelentes imaxes compiladas por Morrison aluden a unha catástrofe moi concreta, nelas resoan outros feitos, desde o desastre recente do Katrina en Nova Orleans á ferida histórica da discriminación e explotación laboral da poboación negra. Que o capítulo titulado Migración se abra coa alegría dun baile é, nese sentido, suficientemente elocuente.

Martin Pawley. Versión galega dos textos escritos para o catálogo do BAFICI 2015. Pode descargarse o catálogo nesta ligazón (PDF, 21 MB).

A 10000 km do BAFICI 2015: Lama? (Nadav Lapid, 2014)

Lama? / Why? (Por que?)
Nadav Lapid (Israel, 2014)
5 min | Cor

Unha serie israelí de "cartas de amor ao cinema" impulsa esta curtametraxe de Nadav Lapid, precisa e sintética a máis non poder. Preguntado por un plano que transformou a súa vida, un cineasta remóntase vinte anos atrás para lembrar un episodio do seu paso polo exército: o visionado de Teorema. A fascinación polo militar, a noción tribal de virilidade e a necesidade de formar parte (obediente) dun grupo, aspectos xa esenciais de Policeman e The Kindergarten Teacher, quedan cuestionadas pola perturbadora forza das imaxes pasolinianas. Entran en tensión a violencia e a beleza, o conformismo e a arte. O colapso final de Massimo Girotti no filme é tamén o do mozo soldado, futuro director. Por sorte para nós, espectadores fascinados.

Martin Pawley. Versión galega do texto escrito para o catálogo do BAFICI 2015. Pode descargarse o catálogo nesta ligazón (PDF, 21 MB).