domingo, 2 de outubro de 2011

Vikingland, seleccionada no festival de Jihlava

O XV Festival de Jihlava, que se celebrará do 25 ao 31 de outubro, inclúe dentro da súa competición oficial o documental Vikingland, dirixido por Xurxo Chirro. O certame checo, un dos máis importantes de Europa no campo da non ficción, seleccionou o filme galego para a súa sección principal, Opus Bonum, que recolle as obras máis destacadas a nivel mundial. A sección de curtas Short Joy do festival de Jihlava acolle ademais a obra doutro autor galego, Lois Patiño, de quen poderán verse diversas pezas da serie Paisaje-Duración.

A estrea mundial de Vikingland tivo lugar o pasado mes de xullo no prestixioso FIDMarsella, un marco excelente para que fora visto por críticos e seleccionadores de diversos países e que lle auguraba unha longa andaina polo circuíto de festivais. O filme ten xa confirmada a súa presenza noutros importantes certames internacionais, cuxa programación será anunciada nas próximas semanas.

Vikingland está baseado nas gravacións en vídeo que fixo Luis Lomba “O Haia”, un mariñeiro da Guarda embarcado nun transbordador entre Romo (Dinamarca) e a illa alemana de Sylt. As imaxes, que dan conta da súa vida e a dos seus compañeiros para erixirse en testemuño da emigración galega, son o punto de partida dunha proposta fílmica anovadora dentro do xénero documental.

1 comentario: